Ֆրանչիսկոս Պապին եւ Հռոմի Քուրիայի Հոգեւոր կրթութիւնը` 6 – 11 Մարտ։

(Ռատիօ Վատիկան) Ինչպէս ամէն տարի, Մեր Տիրոջ Յիսուս Քրիստոսի հրաշափառ Յարութեան տօնին` Սուրբ Զատկուայ ի պատրաստութիւն, Ֆրանչիսկոս Սրբազան Քահանայապետը եւ Հռոմի Քուրիայի – Վատիկանեան Վերին իշխանութեան - պատասխանատուները իրենց քառասնորդացի հոգեւոր կրթութիւնը պիտի կատարեն 6 – 11 Մարտ 2016-ին Արիչչայի` ''Աստուածային Վարդապետի Տուն'' անուամբ կեդրոնին մէջ։

Հոգեւոր կրթութեան քարոզիչն  է Հայր Էրմես Ռոնքի որ իր խորհրդածութիւնները պիտի ամփոփէ տասը հարցումներու ներքոյ որոնք քաղուած են Աւետարանական հատուածներէն։

Հոգեւոր Կրթութեան յայտագիրը սկիզբ կ՛առնէ Կիրակի 6 Մարտի երեկոյեան ժամը 6-ին Սուրբ Հաղորդութեան երկրպագութեան պաշտամունքի եւ ժամասացութեան արարողութեամբ մինչ յաջորդ օրերու յայտագիրը սկիզբ կ՛առնէ առաւօտեան 7,30-ին` գոհաբանական աղօթքով­, ապա 9,30-ին` առաջին մտածականը որուն կը յաջորդէ համապատարագը։ Յետմիջօրէի ժամը 4-ին երկրորդ մտածականը ապա Սուրբ Հաղորդութեան երկրպագութիւն եւ ժամասացութիւն։ Հոգեւոր կրթութիւնը կ՛եզրափակուի ուրբաթ 11 Մարտի առաւօտեան։

Հոգեւոր կրթութեան ընթացքին ընդհատուած կը նկատուին Սրբազան Քահանայապետին գործունէութիւնները ներառեալ չորեքշաբթի օրուայ հրապարակային ունկնդրութիւնը։

''Ետ դառնալով` Յիսուս տեսաւ զանոնք  որ իրեն կը հետեւէին եւ հարցուց. ''Ի՞նչ կ՛ուզէք'' (Յովհ. 1, 38) այս պիտի ըլլայ աւետարանական  առաջին հարցումը որուն վրայ պիտի հիմնուի առաջին մտածականը իսկ յաջորդ օրերու մտածականներու նիւթերը պիտի ըլլան ''Այն ատեն աշակերտներուն ըսաւ, ինչո՞ւ կը վախնաք տակաւին հաւատք չ՛ունիք'' (Մարկ. 4, 40). ''Դուք էք երկրի աղը. Եթէ աղը կորսնցնէ իր համը, ինչ՞ով պիտի համեմուի'' (Մատթ. 5,13). Յիսուս դարձեալ հարցուց անոնց ''իսկ դուք ո՞վ կը կարծէք որ ես ըլլամ'(Ղուկ. 9,20). ''Կնոջ դառնալով ըսաւ Սիմոնին ''կը տեսնե՞ս այս կինը'' (Ղուկ. 7,44)''. Յիսուս հարցուց աշակերտներուն քանի՞ հաց ունիք'' (Մարկ 6,38 – Մատթ. 15,34). ''Յիսուս շտկուեցաւ ու հարցուց կնոջ. ''Ո՞ւր են անոնք. Ոչ ոք քեզ դատապարտեց''  (Յովհ. 8,10). ''Յիսուս ըսաւ անոր ''Ո՛վ կին ինչ՞ու կու լաս, ո՞վ կը փնտռես'' (Յովհ. 20,15). ''Սիմոն Որդի Յովնանու կը սիրե՞ս զիս''(Յովհ. 21,16). ''Մարիամ ըսաւ հրեշտակին ''Ի՞նչպէս պիտի ըլլայ ինծի ասիկա'' (Ղուկ. 1,34)։